Kryeministri i Kosovës, Albin Kurti ka thënë se ka qenë një padrejtësie madhe fakti që BE nuk i ka liberalizuar vizat për Kosovën. Në samitin e Bashkimit Europian me vendet e Ballkanit Perëndimor, Kurti tha se blloku duhet të vazhdojë me zgjerimin në mënyrë që të jetë Europë.
“Kanë kaluar më shumë se 3 vite që kur Komisioni Evropian ka rekomanduar për herë të dytë liberalizimin e vizave. Ka qenë një padrejtësi e madhe, mungesë e drejtësisë karshi qytetarëve tanë që kanë vuajtur shumë.
Ne kemi shpresë që ky samit, do ta bëjë BE-në të qëndrojë besnike në thelbin e saje ky është zgjerimi i saj, si projekti më i rëndësishëm politik dhe historik i paqes dhe prosperitetit që nga Lufta e Dytë Botërore. BE-ja duhet të vazhdojë me zgjerim që të jetë Evropë. Gjashtë vendet e Ballkanit perëndimor janë ato që i mungojnë Bashkimit Evropian të bëhet Evropë. Ne jemi në Evropë, por Bashkimi Evropian duhet të bëhet Evropë”, ka thënë Kurti.
Ai shtoi se shpreson që së shpejti edhe 5 vendet e tjera ta njohin Kosovën si shtet i pavarur.
“Shpresoj që së shpejti ato 5 vende do ti bashkohen vendeve që na kanë njohur. Unë avokoj për mungesën e frikës nga BE-ja dhe hidhërimin nga ana e vendeve të Ballkanit Perëndimor”, tha Kurti.
Kryeministri i Kosovës u ndal edhe te çështja e vaksinave dhe deklaroi se vendi i tij nuk ka marrë vaksina nga Rusia dhe Kina synimi është Bashkimi Europian.
“Ne nuk kemi marrë asnjë vaksinë nga Rusia dhe Kina, sepse Bashkimi Evropian është synimi ynë dhe Evropa është kontinenti jonë”, u shpreh Kurti.
