Pasditen e sotme Kreu i grupit parlamentar të PS, Taulant Balla ka deklaruar se në mbledhjen që grupet parlamentare pritet të mbajnë ditën e nesërme, do të diskutohet për të gjithë pikat që duhet të përmbushë kandidatura për president.
Pyetje: Kur do e bëjë publike PS kandidaturën për president?
Balla: PS prej ditës së parë, kryeministri ka qenë shumë i qartë për të mos zgjedhur një president të PS por të gjithë shqiptarëve dhe dëshira jonë është që presidenti të ketë një votë mbështetëse më të madhe. Nesër diskutohet edhe për kriteret që duhet të plotësojë kandidatura. Ne i kemi përcaktuar fushat.
Gjithashtu në një prononcim për mediat për të sqaruar vendimin e mazhorancës për të rrëzuar rezolutën e Serbrenicës e propozuar nga ish-kryeministri Sali Berisha. Balla tha se mazhoranca do të rrëzojë çdo propozim që do të mbajë firmën e Berishës pasi është shpallur “non grata” nga SHBA.
“Qëndrimi i sotëm i yni kishte të bënte me faktin dhe vendimin e marrë prej nesh se një prej deputetëve propozues në kërkesën e depozituar quhet Sali Berisha deputet i pavarur në Kuvend, i cili me vendimin që ne kemi marrë është i papranueshëm për asnjë lloj propozimi që mund të vijë me firmën e tij në Kuvendin e Shqipërisë. Kemi marrë vendimin të rrëzojmë çdo propozim të tij. Sa herë të depozitohen, kërkesa propozime që do të mbajnë firmën e këtij deputeti ato do të rrëzohen”, u shpreh Balla.
