Dinamo dha sinjalin e parë të rikthimit me fitoren 2-0 ndaj Laçit, ku Bregu shënoi dy gola. Skuadra e trajnerit Ilir Daja e kishte të vështirë të dilte nga seria e katër ndeshjeve pa fitore në kampionat, plus një tjetër në Kupën e Shqipërisë.
Megjithatë, në javën e 26-të, Dinamo përfitoi edhe nga rezultatet e rivalëve, ku Egnatia dhe Partizani humbën, ndërsa Vllaznia barazoi. Kjo bëri që Dinamo të afrohet në 1 pikë me Vllazninë e vendit të dytë dhe të shkurtojë diferencën me liderët e Egnatias në 4 pikë. Një situatë më komode se më parë, që mund të ndikojë pozitivisht edhe në ndeshjen e së mërkurës me Skënderbeun në Kupën e Shqipërisë.
Dinamo e ka të vështirë kualifikimin në Kupë, pasi është mundur 2-0 në ndeshjen e parë ndaj Skënderbeut në “Elbasan Arena”. Për të kaluar në fazën tjetër, ekipi duhet të fitojë me të paktën dy gola diferencë në Korçë.
Megjithatë, mundësia ekziston, pasi Skënderbeu është i angazhuar për mbijetesën në kampionat dhe mund të mos investojë shumë energji për këtë takim para sfidës së fundjavës. Dinamo ka synim të fitojë një trofe këtë sezon dhe pritet të japë maksimumin për kualifikimin në Kupë, pasi në kampionat gjithçka është ende e hapur.
Trajneri Daja do të hedhi në fushë formacionin më të fortë, pa e menduar fare ndeshjen derbi ndaj Tiranës në fundjavë. Ndeshja në Korçë është gjithashtu një mundësi për të testuar pjekurinë e skuadrës, që konsiderohet një nga më të fortat e këtij sezoni.
Për herë të parë pas shumë javësh, Dinamo ka grupin e plotë të lojtarëve. Gjatë ndeshjes me Laçin, nuk pati lëndime, dhe disa lojtarë që kishin munguar nga dëmtimet ishin të gatshëm, përfshirë Ditën, i cili u aktivizua si zëvendësues në pjesën e dytë.
Gjithashtu, Mandela, i cili kishte munguar për disa javë për shkak të një dëmtimi muskulor, ishte në dispozicion për të luajtur disa minuta. Ky është një plus i madh për trajnerin Daja, pasi vlerat e sulmuesit nigerian janë të njohura, dhe ai ka shënuar 2 gola në përballjet e kaluara me Skënderbeun. Portieri Edmir Sali, që ishte jashtë për shkak të një dëmtimi, është gjithashtu i gatshëm për të luajtur.
Me një grup të plotë lojtarësh, Daja mund të bëjë ndonjë rotacion dhe të reagojë në momentet kyçe të ndeshjes. Dinamo nuk do të kursejë asgjë në Korçë, pasi objektivi i saj është kualifikimi në gjysmëfinale të Kupës.
