Si opozita edhe mazhoranca tashmë e kanë bërë të udhës që të ngrenë akuza ndaj njëra-tjetrës për çështje që mbulojnë sektorë të ndryshëm, por transparenca për publikun është zero.
Rasti më i fundit është ai i anëtarit të kryesisë së PD-së, Grigels Muçollari i cili ngre akuza ndaj kreut të qeverisë se po jep leje për ndërtim kulle në godinën ku aktualisht janë zyrat e Kadastrës.
Ai pretendon se fituesi është i paracaktuar dhe një mik i kreut të qeverisë, mirëpo nuk zbulon asnjë emër.
Sakaq, në deklaratën e tij, Muçollari flet dhe për transparencë e llogaridhënie, madje shprehet se njerëzit duhet të jenë pjesë e këtij procesi, të thonë fjalën e tyre, të shohin kostot e përfitimet, pasi çdo gjë bëhet me taksat e qytetarëve. Deri këtu çdo gjë është në rregull.
Por problemi qëndron tek fakti se, nëse kjo çështje duhet të ndiqet në mënyrë ligjore deri në fund, atëherë ku janë emrat dhe transparenca për të cilën Muçollari ngre zërin.
Kjo shkelje, ndërtimi i kullave që është kthyer në modë nga Bashkia, kërkon transparencë maksimale. PD denoncon se fituesi i paracaktuar është miku i Ramës, por pse nuk e tregon emrin e këtij personi?
Nëse do t’ju vinte keq për taksat e qytetarëve, një deklaratë boshe pa fakte, është thjesht për “interesa politike” dhe nuk i shërben popullit që mban mbi shpatulla këtë barrë të rëndë abuzimi nga pushtetarët.
Flasin për transparencë, por harrojnë se që e vërteta të gjendet duhen fakte dhe emra konkretë, përndryshe ata janë bërë palë me shkelësit, duke i mbajtur emrat e tyre sekretë.
Pjesë nga deklarata:
“Edi Rama nuk është pronar i kësaj godine. Këto janë objekte shtetërore, publike, dhe janë pasuri e të gjithë atyre që kanë punuar e kanë kontribuar prej vitesh në këtë vend. Qytetarët nuk mund të lejojnë që kryeministri të sillet si monark a feudal.
Duhet transparencë, duhet llogaridhënie. Njerëzit duhet të jenë pjesë e këtij procesi, të thonë fjalën e tyre, të shohin kostot dhe përfitimet. Pasi çdo gjë në këtë plan është e qytetarëve, dhe çdo gjë do të bëhet me taksat e tyre. Sjellja e Edi Ramës si pronar, dhe një aferë e tij e re me klientelën e preferuar, duhet ndalur”, shprehet ai.
