Partia Demokratike ka paditur kryetarin e Bashkisë Elbasan për shpërdorim detyre. Kjo ankesë është depozituar në Prokurorinë e Posaçme kundër krimit dhe korrupsionit, SPAK. Bëhet fjalë për disa kulla të reja që duken se janë në plan për t’u ndërtuar.
PD pretendon se Gledian Llatja ka bashkëpunuar me firmat private të ndërtimit duke i lënë atyre në disponim disa hapësira të gjelbërta afër godinës së bashkisë.
“Bëhet fjalë për kontratën e partneritetit publik privat që i mundëson kompanisë private ndërtimin e Kullave në lulishten pranë Bashkisë së Elbasanit”, thekson PD.
PD në akt-padinë e paraqitur pranë SPAK, thekson se shkelja e detyrës konsiston në faktin se bashkia i ka dhënë pa të drejtë pronat publike tek kompanitë private.
“Nëpërmjet veprimeve dhe mosveprimeve të paligjshme, Kryetari i Bashkisë Elbasan, ka dëmtuar interesin publik, duke i shkaktuar një dëm të madh ekonomik Bashkisë Elbasan, në të paktën 8.3 milion euro, duke konsumuar elementët e veprës penale “shpërdorim i detyrës” – thuhet në kallëzimin e Partisë Demokratike.
“Konkretisht, në kallëzimin penal provohet se nga zbatimi i kontratës së partneritetit publik privat Bashkia po përfiton vetëm 2648 m2 sipërfaqe të re ndërtimi, ndërkohë që duhet të kishte përfituar 14 560 m2. Në këtë mënyrë, institucioni i Bashkisë ka humbur një sipërfaqe prej 11, 912 m2, ose rreth 8.3 milion euro”, thekson kallezimi i PD.
Kujtojmë se opozita edhe pse e larguar nga parlamenti, ka qenë vazhdimisht e angazhuar me paditë e forta kundër deputetëve socialist. Në thelb të tyre kanë qenë motivi i pastritmit të parave dhe shpërdorimit të detyrës.
