“Reporterët pa Kufij” kanë përshëndetur vendimin e presidentit , Ilir Meta, për kthimin në Kuvend të paketës “Anti-shpifje”.
Nëpërmjet një mesazhi në “tëitter”, “Reporterët pa Kufij”, theksojnë se kjo paketë është një përpjekje e qeverisë për të kontrolluar median.
Ndër të tjera në reagim thuhet , se ndryshimet ligjore bien ndesh me Kushtetutën shqiptare dhe Konventat e të Drejtave të Njeriut.
“Reporterët pa Kufij mirëpresin vendimin e Presidentit Të Shqipërisë, Ilir Meta, për të rikthyer në Parlament 2 ligjet e të ashtuquajturës “paketë anti-shpifje”, që shihet si një përpjekje e qeverisë për të kontrolluar median në kundërshtim me Kushtetutën shqiptare dhe Konventat e të Drejtave të Njeriut”, thuhet në postim.
Presidenti, Ilir Meta e ktheu ligjin “Anti-shpifje” për rishikim në Kuvend ditën e djeshme.
Sipas kreut të shtetit, ky ligj shkel parimet themelore të një shteti demokratik, të drejtën themelore të lirisë së shprehjes, shtypit dhe informimit.
Gjithashtu sipas Metës, ndryshimet ligjore janë në kundërshtim me jurisprudencën e Gjykatës Kushtetuese dhe standartet e Konventës së të Drejtave të Njeriut.
