Kruja vijon të jetë një vatër e nxehtë infeksioni, pasi raste të reja raportohen çdo ditë.
Së fundmi, Dosja.al bën me dije se gjatë 24 orëve të fundit është konfirmuar me Covid-19 një burrë, i cili ka patur kontakt me rastet e tjera të infektuara.
Aktualisht, nuk dihet ende gjendja shëndetësore e personit të infektuar, teksa numri i aktiv i të infektuarve në Krujë ka shkuar në 64.
Deri tani në vendin tonë janë 856 të infektuar, 31 viktima dhe 627 persona të shëruar, teksa pritet përditësimi i të dhënave nga Ministria e Shëndetësisë.
Duket se mos-mbyllja e fasonerive në kohë, ka shkaktuar infektime të shumta në vendin tonë, pasi qeveria arsyetoi se këto biznese nuk mund të mbyllen sepse po punojnë në kushte të sigurta dhe mbi të gjitha konsiderohen si biznese esenciale.
Një fasoneri në Krujë është bërë shkak që virusi të përhapet jo vetëm tek punonjësit brenda kësaj fasonerie, por edhe tek punonjëset e saj nga Laçi dhe Kurbini, të cilët e transmetuan edhe tek familjarët e tyre.
Sakaq, deri tani janë konfirmuar edhe të infektuar me Covid-19, punonjës fasoneri në kryeqytet, teksa nuk dihet ende nëse ato do kthehen në vatër infeksioni.
Duke qënë se fasoneria është kthyer në një vatër infektimi, Instituti i Shëndetit Publik ka vendosur që të mbyllë biznesin.
Nga sa ka rezultuar deri tani, ndonëse drejtuesit e tyre bënin me dije se kishin respektuar të gjithë protokollet e përcaktuara nga Ministria e Shëndetësisë, duket se ato nuk janë përmbushur, ndërsa punonjëset kanë akuzuar se pretendimet e tyre nuk ishin të vërteta dhe se në fabrikë nuk kishin as sapun për duart.
Edhe kryedemokrati Lulzim Basha, ashtu si edhe figura të tjera kanë kërkuar mbylljen e tyre dhe përfshirjen e punonjësve në planin ekonomik të qeverisë.
