Programi Botëror i Ushqimit ka dhënë një alarm të fortë për përkeqësimin dramatik të krizës humanitare në Rripin e Gazës, ku mbi 500 mijë njerëz ndodhen përballë urisë ekstreme.
Në një deklaratë në platformën X (ish-Twitter), WFP paralajmëroi se:
“Jemi në një garë me kohën për të shmangur urinë. Nëse presim derisa të konfirmohet një zi buke, për shumë njerëz do të jetë tepër vonë.”
Organizata i kërkoi bashkësisë ndërkombëtare të ndërhyjë menjëherë dhe të rivendosë ndihmën ushqimore për civilët palestinezë, përpara se situata të kalojë në një tragjedi masive.
Sipas analizës më të fundit për sigurinë ushqimore, Gaza ka kapërcyer kufijtë kritikë të krizës. Çdo vonesë në furnizimet me ndihma mund të rezultojë fatale, veçanërisht për fëmijët, gratë dhe të moshuarit.
Apeli i WFP thekson se shpërndarja e ndihmave është thuajse e paralizuar për shkak të mungesës së korridoreve të sigurta, bllokadave dhe përshkallëzimit të dhunës në terren.
