Deputeti i Lëvizjes Socialiste për Integrim, Petrit Vasili ka folur m,mbrëmjen e sotme në lidhje me situatën politike në vend dhe për herë të parë për “krisjen”, mes PD dhe LSI-së.
Vasili është shprehur se këto janë muhabete fiktive dhe pa asnjë vlerë, ndërsa ka shtuar se LSI-ja ka ecur në bazë të rregullores së Kuvendit dhe se secili prej tyre ka vendin dhe rolin e vetë aty.
“Kjo është një muhabet fiktiv dhe pa asnjë vlerë. Të gjithë anëtarët e LSI, kanë vendin e tyre në Komisionet Parlamentare, dhe këtë nuk e pengon asnjë parti. Është një e drejtë që buron nga rregullorja. Në bazë të kësaj kemi aplikuar dhe çdo gjë është në rregull. Anëtarësia e Komisioneve është një çështje fiktive. Unë jam anëtar i komisionit të çështjeve sociale, Erisa Xhixho është anëtare e komisionit të çështjeve ligjore, unë jam zevëndësues në këto çështje, ndërkohë që Kryemadhi do të bëjë zgjedhjen e vet”, u shpreh Petrit Vasili për Ora News.
Ndër të tjera Vasili thotë se opozita nuk ka ndryshuar linjën e saj që është beteja deri në fund me kapjen e shtetit. Ndër të tjera Vasili ka shtuar se sistemi i drejtësisë në vendin tonë është në kolaps.
Në lidhje me deklaratat e ambasadorëve në vendin tonë se drejtësia po funksionon, Vasili shprehet se nuk është dakord, ku dhe ka renditur një sërë arsyesh.
“Aksioni opozitar ka linjat e tij të pandryshueshme, që është beteja deri në fund me kapjen e shtetit. Unë edhe në fjalën time në Kuvend, kam thënë se si është kapur dhe shpërdoruar Reforma në Drejtësi. Qeveria ka arritur në atë nivel sa të mos jap paratë e domosdoshme funksionimin e Gjykatës Kushtetuese. Pandëshkueshmëria është stabilizuar. Kemi një sistem drejtësie që nuk ka shqyrtuar asnjë çështje. Është një drejtësi që merret me arkën e sardeleve, apo me ndonjë kokërr shalqiri apo pjepër. Unë jam indiferent ndaj asaj që thonë ambasadorët. Si një njeri i politikës.”, është shprehur Petrit Vasili.
