Një ngjarje tronditëse ka ndodhur në fshatin Frashër të Fierit, ku 26-vjeçarja Emanilda Rama ka mbytur me tel babanë e saj, Anesti Rama, 56 vjeç, duke tentuar ta paraqesë ngjarjen si një vdekje aksidentale.
Pas ngjarjes, edhe nëna e saj, Valbona Rama, është arrestuar nën dyshimin për bashkëpunim në fshehjen e provave.
Krimi ndodhi më 24 korrik, dhe fillimisht u raportua në polici si një rast i humbjes së jetës nga shkaqe natyrale. Megjithatë, gjatë deklaratave të para dhe hetimeve të kryera nga grupi hetimor në bashkëpunim me Prokurorinë e Fierit, dyshimet u thelluan dhe zbuluan të vërtetën tronditëse: vajza kishte pranuar se kishte vrarë të atin pas një konflikti për motive që lidhen me kontrollin e rreptë të këtij të fundit mbi jetën e saj personale.
Sipas dëshmisë, Emanilda Rama kishte kohë që përballej me presionin e vazhdueshëm të të atit, të cilin e përshkruan si tejet fanatik, duke mos e lejuar të vishej apo të dilte sipas dëshirës. E ndarë prej pak kohësh nga partneri, ajo jetonte në të njëjtin ambient me prindërit.
Pas aktit të rëndë, në bashkëpunim me të ëmën, ajo ka tentuar të fshijë provat duke pastruar trupin dhe e kanë veshur viktimën për ceremoninë mortore, përpara se të lajmëronin policinë.
Por hetuesit kanë konstatuar shenja të dukshme dhune në trupin e viktimës, përfshirë edhe dëmtime në zonat intime, për të cilat e bija ka mohuar se lidhen me ndonjë abuzim seksual, pa dhënë sqarim për këtë akt brutal pas vrasjes.
Nga hetimet ka rezultuar gjithashtu se Anesti Rama, një punëtor në një fermë blegtorale në zonë, kishte qenë prej kohësh i dhunuar fizikisht dhe i izoluar nga familja. Ai jetonte në një dhomë të veçuar, në të njëjtin oborr me bashkëshorten dhe vajzën, ndërsa fqinjët konfirmojnë se ai ishte i përjashtuar nga pjesa tjetër e familjes.
Policia konfirmoi arrestimin e Valbona Ramës më 25 korrik, pas marrjes në pyetje dhe vlerësimit të rolit të saj në bashkëpunimin për fshehjen e së vërtetës.
Tashmë, nënë e bijë ndodhen në paraburgim dhe pritet masa e sigurisë ndaj tyre.
