Temperaturat ekstreme të motit në ditët e fundit në vendin tonë kanë aktivizuar disa vatra zjarri nga jugu në veri. Situata më problematike paraqitet në Karaburun ku zjarrfikëset prej ditësh janë në luftë me flakët për të parandaluar përhapjen në zonat e banuara. Ditën e sotme mësohet se në zonën e malit të Cukalit, në njësinë administrative Shllak të bashkisë së Vaut të Dejës, është aktivizuar një vatër e madhe zjarri e cila po përhapet me shpejtësi.
Mësohet se forcat zjarrfikëse kanë shkuar në vendngjarje dhe po punojnë për shuarjen e flakëve, por terreni i vështirë dhe i pafavorshëm e bën të pamundur hyrjen e automjeteve edhe po punohet me fuqi njerëzore për shuarjen e zjarreve.
Ndërkohë nga ana tjetër prefektura Shkodër ka bërë me dije se një tjetër vatër zjarri është aktive në Shtoj të Vjetër, në binarët e hekurudhës ku dyshohet për zjarrvënie të qëllimshme.
Po ashtu zjarri vijon të jetë aktiv në fshatin Grudë e Re në Shkodër, ku deri më tani janë djegur shkurre dhe mbeturina, por situata mund të përkeqësohet. Ndërkohë bashkia Shkodër kërkon nga strukturat ligjzbatuese që të të gjithë përgjegjësit të vihen para përgjegjësisë. Po ashtu situata mbete kritike edhe në Lunxhëri ku është riaktivizuar një tjetër vatër zjarri. Aktualisht forcat e shërbimit të zjarrfikëses kanë ndodhen në terren, ku po përballen me flakët e zjarrit.
