Teksa situata nga COVID-19 në vendin tonë po shkon drejt përmirësimit, qeveria ka vendosur lehtësimin gradual të një sërë masash kufizuese në 3 të hënat, pra 4, 11 dhe 18 maj.
Mbrëmjen e sotme kreu i Urgjencës Kombëtare, Skënder Brataj foli në Open për situatën e koronavirusit në vendin tonë, duke u ndalur edhe tek paralajmërimet për një valë të dytë, duke u shprehur se nuk e beson diçka të tillë.
Megjithatë, Brataj shtoi se vendi ynë është i gatshëm ta përballojë një valë të dytë, pasi janë blerë respiratorë, ventilatorë dhe janë marrë ndihma , një pjesë e mirë e të cilave nuk është përdorur, nisur nga numri i ulët i të shtruarve në spitalet Covid.
“Covid-19 është pjesë e familjes së koronavirusit si Sarsi apo edhe Mersi. Ato u zhdukën në verë. Duke marrë parasysh që rritja e temperaturave është shkatërruese për çdo virus, jo vetëm për Covid-19, besoj se nuk do të ketë një valë të dytë infektimesh. Gjithsesi ne jemi të përgaitur. Ne morëm ventilator. Në fillim kemi marrë 50. Por duke llogaritur që kemi pasur 40 persona në gjendje të intubuar, 31 që humbën jetën dhe 8 që janë aktualisht, do të thotë që ne nuk i kemi përdorur të gjitha burimet tona që kishim dhe pa ardhur ndihmat. Prandaj them se jemi të përgatitur.”
Ndërsa sa i përket hapjes gradual të vendit, numri 1 i Urgjencës tha se pritet një rritje e numrit të rasteve të reja me koronavirus, por sipas tij nuk do jetë shumë i madh.
Brataj tërhoqi vëmendje që masat të respektohen me përpikmëri dhe mos të ketë kalime nga zonat e kuqe në ato të gjelbërta dhe anasjelltas, teksa përmendi edhe rastin e gruas shtatzënë nga Fieri, e cila ka infektuar të birin dhe vjehrrën pasi erdhi në Tiranë.
“Ne do hapemi, por me hapjen mund të rritet numri I rasteve të reja. Rritja e numrit nuk besoj se do të jetë shumë e madhe. Gruaja shtatëzënë që ka lëvizur nga Tirana drejt Fierit ka shkelur ligjin. Nuk bë që të lëzivësh nga një zonë e infektuar tek një zonë e gjelbër sepse rrezikon gjithë komunitetin. Gjithashtu dua të theksoj edhe diçka tjetër. Ka persona që vijnë nga jashtë dhe ankohen se u futën në karantinë me pretekstin që janë karantinuar në vendin ku ishim. Karantina bëhet vetëm për të mbrojtur komunitetin”- shtoi Brataj.
Bilanci i të prekurve në Shqipëri ka shkuar në 832 të infektuar, 595 të shëruar dhe 31 viktima, teksa qeveria ka nisur hapjen graduale të bizneseve.
