Sot, myslimanët në të gjithë botën kremtojnë Fitër Bajramin, një nga festat më të rëndësishme të kalendarit islam.
Kjo ditë simbolizon përfundimin e muajit të shenjtë të Ramazanit, pas 30 ditësh agjërimi dhe adhurimi.
Në Shqipëri, mijëra besimtarë u mblodhën në sheshin “Skënderbej” për faljen e namazit të Bajramit, e cila nisi në orën 06:45 me leximin e Kuranit dhe ligjëratën fetare, për t’u pasuar nga falja e përbashkët.
Festa e Bajramit shoqërohet me drekën tradicionale, vizita tek të afërmit dhe ndarjen e gëzimit me familjen dhe miqtë.
Ndër traditat e kësaj feste është edhe dhënia e lëmoshës për të varfrit, një akt bamirësie që simbolizon solidaritetin dhe ndihmën ndaj atyre në nevojë.
Kreu i Komunitetit Mysliman të Shqipërisë, në mesazhin e tij për këtë festë, uroi besimtarët dhe shprehu urimin që Zoti t’u ketë pranuar agjërimin, duke i ndihmuar ata në sfidat e jetës.
Ai theksoi rëndësinë e vlerave familjare, mëshirës dhe unitetit, duke e cilësuar Bajramin si një vazhdim të mësimeve të Ramazanit në jetën e përditshme.
“Kjo ditë sot na gjen me zemra të mbushura dhe sakrifica jonë është pranuar. Jetojmë në një epokë ku vlerat e familjes po lëkunden dhe njeriu matet me atë që ka. Kjo ditë është një urë mes asaj që kemi mësuar në Ramazan dhe atë që do të bëjmë pas tij. Bajrami na kujton unitetin, mëshirën dhe drejtësinë, ne jemi një komb”, tha kreu i KMSH.
