Komisioni Qendror i Zgjedhjeve ka bërë thirrje për përshpejtimin e procesit të publikimit të listave të zgjedhësve, duke tërhequr vëmendjen e bashkive për vonesat në disa zona.
Sipas KQZ-së, janë konstatuar vonesa në afishimin e listave dhe vështirësi për zgjedhësit me aftësi të kufizuara në disa bashki, si dhe mungesë informacioni për vendndodhjen e Qendrave të Votimit .
Për më tepër, shumica e bashkive nuk kanë filluar ende procesin e njoftimit të zgjedhësve, për shkak të mungesës së fondeve dhe paqartësive në modelin e njoftimit, ndërkohë që afati për përfundimin e këtij procesi është 6 mars 2025.
KQZ i kërkon bashkive që të përfundojnë raportimin e caktimit të vendndodhjeve të QV-ve në kohë. Gjithashtu, Komisioni kërkon që Ministria e Brendshme të mbështesë bashkitë për të mundësuar përmbushjen e këtyre detyrimeve brenda afateve të përcaktuara nga Kodi Zgjedhor.
