Kryetari i Këshillit të Lartë Gjyqësor, Ilir Rusi, në fjalën e tij gjatë konferencës përfundimtare të mandatit kushtetues të KPK dhe Komisionerëve Publikë (KKP), theksoi se KLGJ ka kapacitetet administrative dhe ligjore për të vazhduar procesin e vlerësimit kalimtar të magjistratëve.
Ai theksoi se ky proces do të bazohet në parametra të rëndësishëm si shpejtësia, profesionalizmi dhe transparenca. Rusi shtoi se KLGJ ka dëshmuar kapacitetet e tij në vlerësimin etik dhe profesional të magjistratëve, si dhe në vlerësimin e figurës dhe pasurisë së tyre.
Ai shprehu mirënjohjen për ata që kanë kontribuar në këtë proces dhe e siguroi publikun se ky proces do të vazhdojë për të mirën e Shqipërisë.
“KLGJ i ka demostruar kapacitetet e veta për 3 komponentë në të cilët procesi i vetingut është bazuar që janë vlerësimi etik dhe profesional, i figurës dhe pasurisë. KLGJ që kur është formatuar është ideuar që nëse do të vijë një moment, kur mandati i disa organeve që kanë kryer vlerësimin kalimtar të magjistratëve do të përfundonte do ta vijonte më tej KLGJ.
KLGJ i ka të gjitha kapacitet administrative ligjore për të vijuar më tej procesin e vlerësimit kalimtar për të mirën e vendit dhe do të jetë i bazuar në disa parametra, shpejtësinë profesionalizimin dhe transparencën. Suksese ata që kanë kontribuuar në këtë proces, vlerësim për punë e tyre. Kjo është puna jonë dhe ne do ta bëjmë në të mirën e Shqipërisë”, tha ai.
