TikTokeri i njohur shqiptar, Kozak Braçi, është ndëshkuar nga Policia me një gjobë prej 100 mijë lekësh të reja për ndotje të mjedisit, pasi u kap në një video duke mësuar disa turistë të hidhnin mbeturina nga dritarja e një automjeti në lëvizje. Në momentin e regjistrimit, ai ndodhej në makinë si pasagjer.
Videoja që dokumenton veprimin u publikua në rrjetet sociale dhe u përhap me shpejtësi, duke shkaktuar reagime të forta nga qytetarët.
Reagimi i publikut çoi në ndërhyrjen e Policisë, e cila nisi hetimet për të identifikuar personin përgjegjës. Pas verifikimeve, u konstatua se videoja ishte regjistruar disa kohë më parë, por kjo nuk e pengoi policinë që të identifikonte autorin dhe të merrte masa administrative ndaj tij.
Kozak Braçi është një personazh i njohur në rrjetet sociale për videot satirike dhe provokuese që shpesh tërheqin vëmendjen e publikut, megjithatë, shpesh është përfshirë në probleme që e kanë sjellë pranë uniformave blu.
