Deputetët e Kuvendit të Kosovës do të mblidhen sot për të 35-tën herë radhazi në përpjekje për të konstituar institucionin më të lartë ligjvënës në vend.
Pavarësisht betimit të deputetëve të rinj, Kuvendi mbetet i pakompletuar për shkak të mungesës së një marrëveshjeje për zgjedhjen e kryetarit dhe nënkryetarëve të tij.
Prej disa javësh, seancat zhvillohen në mënyrë të përsëritur çdo 48 orë, duke u reduktuar në një proces formal që nuk po prodhon rezultat për shkak të mungesës së konsensusit politik.
Lëvizja Vetëvendosje vijon të mbështesë Albulena Haxhiun si kandidate për postin e kryeparlamentares, por nuk ka arritur të sigurojë mbështetje nga partitë e tjera.
Partia Demokratike e Kosovës dhe Aleanca për Ardhmërinë e Kosovës kanë kërkuar zyrtarisht nga LVV të propozojë një emër tjetër, ndërsa Lidhja Demokratike e Kosovës ka deklaruar se nuk do të votojë asnjë kandidat.
Situata mbetet e bllokuar dhe pa një marrëveshje politike në horizont, rrezikon të zvarritet edhe më tej funksionalizimi i Kuvendit të ri.
