Ditën e sotme në vendin tonë u regjistruan 19 raste të reja me koronavirus, duke e çuar numrin e përgjithshëm në 123.
Në mesin e të prekurve është edhe drejtori i Urgjencës Kombëtare, Skënder Brataj.
Lajmin e ka dhënë Ministrja e Shëndetësisë, Ogerta Manastirliu, në një postim në rrjetet sociale.
Manastirliu shton, se Brataj ndodhet në shtëpi në vetëizolim dhe gjendja e tij është e stabilizuar.
Postimi i plotë
Dr. Skënder Brataj është konfirmuar pozitiv ditën e sotme pas kryerjes së analizës per Covid19. Deri tani gjendja e tij paraqitet e stabilizuar dhe Dr. Brataj ndodhet në vetëizolim, në shtëpinë e tij.
Uroj me shpirt ta kalojë sa më lehtë këtë situatë dhe t’i bashkohet sa më shpejt, i shëruar plotësisht, ekipit tonë që po lufton çdo ditë me këtë armik!
Kujtojmë këtu se gjatë 24 orëve të fundit janë kryer 74 teste, nga të cilat 19 rezultuan pozitivë.
Për momentin, në spitalin Infektiv ndodhen 79 pacientë, dy prej të cilëve në gjendje më të rënduar, ndërsa pjesa tjetër janë të shtruar në pavion në gjendje të stabilizuar.
Deri me tani nga koronavirusi janë shënuar 5 viktima, ndërsa 10 pacientë janë të shëruar, pasi rezultuan negativ në të dy testet.
Autoritetet ndërkohë vijojnë me thirrjet për respektimin e higjienës, distancimit social dhe kufizimit të daljeve nga shtëpitë.
