Policia e Kurbinit ka shpallur në kërkim dy persona pas ngjarjes së diëts së sotme në Mamurras, ku mbetën të plagosur tre persona, dy prej të cilëve efektivë policie.
Mësohet se personat e shpallur në kërkim janë shtetasit Ndue Zefi, 28 vjec dhe Gjon Fufi, 40 vjeç. Ata nuk kanë ndaluar pas urdhrit të patrullës së policisë dhe mësohet se Zefi dhe Fufi janë të afërm të ish-deputetit demokrat Mhill Fufi.
Ngjarja ndodhi sot rreth orës 13:35 në qendër të qytetit të Mamurrasit ku disa persona u konfliktan me patrullën e policisë që ishte në shërbim.
“Një nga punonjësit e Policisë ka nxjerrë armën e shërbimit dhe ka qëlluar dhe për pasojë janë plagosur dy kolegët e tij, I. Z. dhe F. LL., si dhe një nga personat e përfshirë në konflikt, shtetasi N. V., të cilët ndodhen jashtë rrezikut për jetën. Është krijuar menjëherë një grup i posaçëm hetimor, i përbërë nga Specialistë të Hetimit në Shërbimin për Çështjet e Brendshme dhe Ankesat në Ministrinë e Brendshme dhe Specialistë të Hetimit në Drejtorinë Vendore të Policisë Lezhë, dhe nën drejtimin e drejtuesit të Prokurorisë së Rrethit Gjyqësor Kurbin, vijon puna intensive në vendin e ngjarjes, duke administruar çdo provë dhe po marrin dëshmi, me qëllim sqarimin në mënyrë të plotë dhe të gjithanshme të kësaj ngjarjeje. Informacion më të detajuar do të japë Shërbimi për Çështjet e Brendshme dhe Ankesat, në përfundim të veprimeve të para hetimore”, njoftoi policia.
