Mediat ndërkombëtare që raportojnë në frontin e luftës në zonën e kontestueshme Nagorni-Karabak, kanë shkruar se luftimet mes armenëve dhe azerëve po intensifikohen.
Sipas raportimeve shpërthimet që kanë ndodhur në zonën ku po zhvillohen luftimet kanë tronditur qytetet përreth.
Ndërkohë pasi trupat zere pushtuan disa fshatra kufitarë me Armeninë, kryeministri armen Nikoll Pashinian, pohoi se shkalla e sulmit ishte e pashembullt.
Mediat e huaja kanë raportuar se Forcat e Armatosura armene po godasin Terterin e Goradizin, në rrethin Fizuli. Megjithatë në media ende nuk raportohet se çfarë lloj masash janë marrë.
“Ne jemi duke përjetuar, ndoshta, momentin më vendimtar në historinë tonë mijëravjeçare,” pohoi Pashinian, duke shtuar:”Sot, më shumë se kurrë, ne jemi të vendosur të mbrojmë identitetin tonë, atdheun tonë, të drejtën tonë.”
Forcat armene dhe azere kanë treguar pak gatishmëri për t’i ndaluar luftimet që nisën në 27 shtator.
Më shumë se 100 persona, përfshirë dhe mjaft civilë kanë mbetur viktima të përleshjeve. Zyrtarisht pjesë e Azerbajxhanit, Nagorno Karabaku qeveriset nga armenët etnikë, e për këtë rajon, dy ish-republikat sovjetike, kanë zhvilluar një luftë në vitet 1988-1994, ku vdiqën 30.000 vetë.
