Prokuroria e Posaçme ka nisur marrjen në pyetje për padinë e nisma “Thurje” për koncesionin e sterilizimit.
Pjesë e padisë janë zyrtarë të lartë, midis të cilëve edhe ish-ministri i Shëndetësisë, Ilir Beqja.
Mësohet se SPAK ka thërritur ditën e sotme urologun, Artan Koni, në cilësinë e personit që ka dijeni mbi ngjarjen.
Pas daljes nga SPAK-u, Koni ka dhënë një deklaratë për mediat, duke thënë se shqiptarët sot paguajnë 90 euro për sterilizimin e një seti veglash operacioni.
“Unë sqarova detajet si është bërë kjo llogari. Nuk mund të them cdo detaj për shkak të hetimit, por ishte një deklaratë për të ndihmuar prokurorët si bëhet llogaritja në fushën e mjekësisë për sterilizimin. Kemi dyshime se është koncesion korruptiv, tani mbetet ta vlerësojë prokuroria. Baza kryesore është llogaria, kostot ekonomike, paguajmë 7 milionë euro në vit, për një set kosto na del 2.4 euro, ndërsa ne paguajmë 90 euro. Llogaritjen e dënimit nuk mund ta bëjmë ne, por prokuroria dhe të na thotë nëse ka dëm kundër shqiptarëve. Sot thashë detaje për atë kallëzim që kishim bërë dy javë më parë. Nuk kam prova të reja” tha ai.
Koncesioni i sterilizimit është fituar nga “Sani Service”. Ai ka 5 vite që zbatohet dhe është firmosur nga ish-ministri Ilir Beqja.
Prokuroria e Tiranës e nisi fillimisht hetimit, por çështja u pushua.
Pas denoncimit të nisma “Thurje”, hetimi është rihapur.
Në pyetje do të merren zyrtarët që kanë firmosur për koncesionin dhe përfaqësuesit e kompanisë private.
