Koncesioni i sterilizimit ka ‘fundosur’ 8 zyrtarë mes tyre ish-zëvendësministri i Shëndetësisë Klodian Rrjepaj dhe biznesmeni Ilir Rrapaj. Lidhur me këtë çështje ku duket qartazi që është abuzuar, ka reaguar edhe gazetari Ermal Mulosmani, i cili në veçanti ka komentuar reagimin e djeshëm të i Ilir Beqajt, i cili ka qenë firmëtar i këtij koncesioni në cilësinë e ministrit të Shëndetësinë në atë kohë.
Me anë të një shkrimi në rrjetet sociale gazetari shprehet se sqarimi i Beqajt tregon se nuk është koncesion, por partneritet publik-privat, duke nënkuptuar se koncesioni është një e drejtë për të “rrjepur” qytetarët, ndërsa partneriteti shtet-privat është “e drejtë” për të “rrjepur” shtetin, pra qëllimi ngelet i njëjtë, thithja e parave të qytetarëve. Gjithashtu Mulosmani thekson se ish-ministri Beqaj “duhet të japë llogari pse e paguan aq sa e paguan shteti setin e ri kirurgjikal dhe pse u përzgjodh ai që u përzgjodh në vend të një tjetri.”
“Ilir Beqaj paska bërë një sqarim për koncesionin e sterilizimit. Sipas atij sqarimi, Beqaj pretendon se ky nuk është konçesion por partneritet publik-privat. Duke bërë dallimin mes tyre, ish Ministri thotë që konçesioni është një e drejtë për “të rrjepur” qytetarët. Ndërsa partneriteti shtet privat është “e drejtë” për “të rrjepur” shtetin.
Dakort zoti Ministër. Po ku i merr paratë shteti? A nuk është e njëjta gjë si tia marrë xhepave të qytetarëve drejtpërdrejt si tia marrë pasi ky tia ketë dhënë shtetit?
Kryefjalë është rrjepja e parave të publikut nga privati.
Por nuk është ky thelbi i konfliktit që ka akuza me të akuzuarit. Problemi është menaxhimi i këtyre fondeve, prokurimi i tyre, përzgjedhja e fituesit të parakontraktuar dhe shpërdorimi i jashtëzakonshëm. Problem është jo pse paguan shteti setin e ri kirurgjikal por pse e paguan aq sa e paguan dhe pse u përzgjodh ai që u përzgjodh në vend të një tjetri. Ja për këtë duhet të japë llogari Beqaj’, shkruan në reagimin e tij Mulosmani.
