Presidenti i vendit, Ilir Meta ka dhënë një konferencë për mediat ku ka thënë se ligji për zgjatjen e koncesionit të Aeroportit të Rinasit , të cilin ai e ktheu në Kuvend, është një provë se shteti është i kapur dhe i korruptuar.Meta i ka bërë thirrje çdo deputeti që të reflektojë për këtë nismë dhe të respektojnë Kushtetutën. Ai ka thënë se ka një dokument me 43 faqe me argumente ligjore dhe për këtë fton deputetët, opozitën e gazetarët të njihen me to.
“Ky ligj është një provë e korrupsionit dhe kapjes së shtetit. Kuvendi duhet të kërkojë vënien para përgjegjësisë çdo funksionari publik që ka shkelur procedurat. I bëj thirrje çdo deputeti dhe çdo zyrtari të lartë të reflektojë me shumë përgjegjësi për këtë nisëm dhe të respektojë Kushtetuën dhe ligjet në fuqi, për cdo vepër penale nuk do të ketë amnisti por vetëm drejtësi. Pas 25 prillit vendi do të kthehet në shinat e shtetit të drejtës. Po u jap mundësinë deputetëve të reflektojnë duke kthyer mbrapsht në Këshillin e Ministrave këtë nisëm. I ftoj të gjithë deputetët dhe partitë e opozitës, dhe gazetarët e pavarur të njihen me argumentet zyrtare, këtu janë 43 faqe me argumente kushtetues, ligjor. Është një ftesë për deputetët ta lexojnë, mos thonë që nuk e kishim mendjen. Por edhe opinionin publik që të njihet me këtë kryevepër të kapjes së shtetit nga një dorë të vetme.”, ka thënë Meta.
Gazeta Reforma ka bërë publike më herët ligjin që parashikon zgjatjen e koncesionit të Aeroportit të Rinasit me 13 vite. Në kontratë thuhej se grupi Kastrati, I cili tashmë ka pronësinë e plotë do të paguajë në total 71 milionë euro, të ndara në 2 këste, ku fillimisht do të bëhet një pagesë fillestare prej 15 milion euro dhe më pas një shumë prej 56 mln euro e konsideruar si shuma e mbylljes.
