Ditën e djeshme, familjarë dhe të mbijetuar të genocidit në Kosovë kanë vendosur të bëjnë një protestë para Ambasadës së Serbisë në Uashington.
Përfaqësues të komunitetit shqiptaro-amerikan kanë kërkuar edhe një herë drejtësi për krimet e luftës.
Një nga të mbijetuarat e dhunës seksuale serbe, Vasfije Krasniqi Goodman, ka bërë dëshminë e saj të tmerrshme para Kongresit Amerikan, ku ka treguar se shpreson që të mund të bëhet drejtësi.
“Është një punë që është dashur të hapej edhe më herët. Pak me vonesë, por më mire vonë se hic dhe unë e kam kauzën me luftu për drejtësi dhe me thy stigmën jo vetëm në Kosovë, por edhe në gjithë botën, ku kanë ndodhur dhunime gjatë luftrave”.
Gjatë fjalës së saj edhe pse me emocione të shumta, ka thënë se nuk ka qenë aspak e lehtë për të që të vendosjes para ambasadës serbe për të protestuar edhe pse ndihet krenare që tashmë mund ta bëjë.
“Por kjo është me u tregu atyre se ne nuk ndalemi para se drejtësia të shkojë në vend dhe këta me i pranu krimet që kanë kryer, me kërku falje për krimet dhe me i dënu kriminelët. Kështuqë ndihem krenare që jam para ambasadës serbe, me i tregu këtyre që ne shqiptarët duam drejtësi. Jo hakmarrje, por drejtësi”, thotë ajo.
Sipas VOA ka folur edhe anëtari i Këshillit Bashkiak të Nju Jork, Mark Gjonaj, i cili theksoi edhe një herë që dëmi që ushtria serbe ka bërë në Kosovë ka qenë i tmerrshëm, ndaj sot po luftojnë pikërisht për drejtësi.
“Sot është një ditë që mbas 20 vjetëve të kujtohen gabimet, dëmi që ka ndodhur në Kosovë. 20 mijë femra janë përdhunuar, 13 mijë vetë kanë vdekur, 1620 janë zhdukur. Kemi filluar një lobim të fortë, të vazhdueshëm që me u vu presion Serbisë që kriminelat e luftës të paraqiten para gjykatës, që t’i gjykojmë ne. Zoti ka me i gjyku në jetën tjetër”, tha Gjonaj.
