Komisioni Hetimor Parlamentar ka miratuar raportin përfundimtar për Presidentin e Republikës Ilir Meta. Kreu i Komisionit Alket Hyseni ka hedhur në votim raportin, i cili është mbështetur nga të gjithë deputetët në mënyrë unanime.
“Kush është dakord me raportin, konkluzionet e tij, gjithë sugjerimet? Miratohet raporti i Komisionit Hetimor për verifikimin e shkeljeve të rënda kushtetuese nga Presidenti i Republikës së Shqipërisë me votat unanime të gjithë anëtarëve të komisionit. Vlerësim maksimal për secilin nga ju kolegët”, deklaroi Hyseni.
Raporti thekson se Presidenti i Republikës, Ilir Meta, ka mbajtur qëndrime të njëanshme politike, duke shkelur Kushtetutën për paanësi politike. Hyseni tha se në deklaratat e tij, presidenti Meta ka vënë në rrezik marrëdhëniet me Shtetet e Bashkuara të Amerikës, si dhe ka sulmuar ambasadoren amerkane Yuri Kim.
Gjithashtu, raporti thekson se Ilir Meta ka cënuar imazhin e vendit. Sipas raportit, presidenti është përfshirë direkt në fushatën elektorale, duke sulmuar mazhorancën, ç’ka është e ndaluar në Kushtetutë. Hyseni tha se retorika e presidentit, ka inkurajuar dhunën gjatë fushatës elektorale.
Kujtojmë se burime të sigurta për Gazeta Reforma bëjnë me dije se Komisioni Hetimor Parlamentar do të shkarkojë presidentin Ilir Meta këtë javë ose brenda javës tjetër, në varësi të kohëzgjatjes së procedurës.
