Kombëtarja e Serbisë ka mbërritur në Tiranë për të zhvilluar ndeshjen kualifikuese për Kupën e Botës kundër Shqipërisë, që do të luhet të shtunën në mbrëmje në “Arenën Kombëtare”. Që nga momenti i mbërritjes në Rinas, përfaqësuesja serbe është shoqëruar nga Policia e Shtetit nën masa të shtuara sigurie.
Fillimisht ishte planifikuar që ekipi serb të akomodohej pranë stadiumit, por në momentet e fundit është ndryshuar destinacioni dhe ata janë vendosur në një hotel tjetër në Tiranë. Ky ndryshim ka detyruar autoritetet të rishikojnë edhe planin e sigurisë, duke përfshirë bllokimin e disa rrugëve shtesë.
Në një njoftim zyrtar, Policia e Shtetit bën të ditur se:
“Rruga nga hoteli ku është akomoduar ekipi i futbollit të Serbisë që ndodhet në bulevardin “Gjergj Fishta”, deri në drejtim të stadiumit “Arena Kombëtare”, përmes bulevardit “Bajram Curri”, pasditen e sotme në orën 16:30 dhe ditën e nesërme në orën 18:45, do të ketë kufizime të pjesshme deri në 25 minuta në momentin që do eskortohet ekipi për në stadium për stërvitje pasditen e sotme dhe nesër për të zhvilluar ndeshjen”.
Policia shton se është angazhuar maksimalisht për të garantuar mbarëvajtjen e aktivitetit dhe shmangien e incidenteve, duke kërkuar bashkëpunimin e qytetarëve:
“Policia e Shtetit është angazhuar maksimalisht që i gjithë aktiviteti të përfundojë me sukses për sa i përket masave të sigurisë, dhe në këtë kuadër me qëllim shmangien e incidenteve, apelojmë për mirëkuptim nga ana e qytetarëve, si dhe respektim të udhëzimeve të strukturave të policisë në terren”.
Gjithashtu, autoritetet paralajmërojnë për ndëshkime të rrepta ndaj çdo sjelljeje që cënon rendin dhe sigurinë publike:
“Çdo sjellje apo veprim që cenon rendin dhe sigurinë publike do të trajtohet në përputhje me ligjin dhe me tolerancë zero”, theksohet në komunikatën zyrtare.
