Ministria e Arsimit ka miratuar Kodin e ri të Etikës për mësuesit e sistemit parauniversitar, i cili vendos standarde të qarta mbi sjelljen, paraqitjen dhe përdorimin e rrjeteve sociale nga personeli arsimor.
Sipas dokumentit, mësuesit duhet të jenë të kujdesshëm në çdo dalje publike dhe në aktivitetin e tyre online, duke u siguruar që postimet, fotot apo videot të mos cenojnë figurën e edukatorit. “Mësuesi duhet të ruajë gjithmonë figurën e tij si model edukues, si brenda ashtu edhe jashtë shkollës, të nxisë sjellje të përgjegjshme dhe të edukojë nxënësit për përdorimin e sigurt të platformave online”, thekson Ministria e Arsimit.
Një pjesë e rëndësishme e rregullave lidhet me paraqitjen në punë. Kodi kërkon që mësuesit të kenë pamje të rregullt, të pastër dhe profesionale, duke shmangur veshjet ose aksesoret që bien në sy apo krijojnë zhurmë. “Stolitë dhe elementet shtesë duhet të jenë të thjeshta e të përshtatshme për mjedisin shkollor, duke evituar bizhuteritë e mëdha, me ngjyra të forta ose që prodhojnë tinguj, pasi mund të shpërqendrojnë nxënësit gjatë mësimit”, përcaktohet në dokument.
Kodi i ri nënvizon gjithashtu respektimin e privatësisë dhe dinjitetit të nxënësve, si dhe rolin e mësuesit si shembull në zgjidhjen paqësore të konflikteve. Përveç kësaj, mësuesit me përvojë kanë detyrimin të mbështesin dhe udhëzojnë kolegët e rinj në procesin arsimor.
Ky ndryshim synon të forcojë integritetin dhe përgjegjshmërinë e trupës mësimore, duke e përshtatur sistemin arsimor me realitetin e ri të ndikimit të teknologjisë dhe rrjeteve sociale.
