Kërkesa e kreut të Grupit Parlamentar të LSI-së, Petrit Vasili për shkarkimin e kryeprokurores Arta Marku do të merret në shqyrtim këtë të premte.
Kjo është lajmëruar nga Këshilli i Lartë i Prokurorisë, i cili ka vendosur që ta marrë përsipër çështjen dhe të hetojnë për të.
Në kërkesën e Vasilit drejtuar KLP-së thuhej se Marku duhet të shkarkohej ose të ndiqej penalisht, pasi nuk e ka verifikuar kandidaturën e Bujar Sheshit para se ta emërojë atë pjesë të KLP-së. Ndërkohë që emri i Sheshit është dërguar për t’u verifikuar si integritet figure nëse i plotësonte kriteret për t’u emëruar, por kryeprokurorja nuk e ka pritur vendimin e institucionit.
Bujar Sheshi pasi ka kaluar të gjithë filtrat e Vetting-ut është bërë pjesë e KLP, ndërsa nga Autoriteti i Dosjeve u publikua një material që dokumentonte se Sheshi ka qenë pjesë e Sigurimit të Shtetit me pseudoninimin “Venusi”. Sheshi i ka mohuar këto akuza dhe ka hedhur në gjyq Autoritetin e Dosjeve.
“Këshilli i Lartë i Prokurorisë njofton mbledhjen e gjashtë të këtij institucioni, e cila do të mbahet ditën e premte , datë 22 shkurt 2019, ora 10.00 në sallën e ish-këshillit të Lartë të Drejtësisë. Seanca do të zhvillohet pa praninë e mediave”, thuhet në njoftimin e dhënë.
