Partia Demokratike ka denoncuar atë që e quan “masakër elektorale” të kryer nga Edi Rama dhe Tom Doshi. Në një deklaratë për media, Enkelejd Alibeaj ka thënë se çdo ditë dalin prova dhe fakte se bandat në pushtet kanë vjedhur zgjedhjet. Alibeaj u shpreh se shqiptarët janë të vetëdijshëm se si kanë vepruar Rama e Doshi për të blerë rezultatet e zgjedhjeve dhe se të tjera fakte do të publikohen ditët në vijim.
Deklarata e plotë:
Sot po luftojmë për demokracinë në vendin tonë.
Çdo ditë dalin në pah fakte, prova dhe dëshmi të akteve të Ramës –Doshit dhe bandave të pushtetit për të vjedhur zgjedhjet.
Në video që do të ndjekim tani, të gjithë do të shihni dhe dëgjoni se si prokurori para zgjedhjeve thotë se nuk kishte asnjë provë në makinat e bandave të Elbasanit. Ndërsa pas zgjedhjeve, prokurori deklaron të kundërtën. Ai thotë se policia gjeti para dhe karta identiteti në makinë.
Ja si po mbrohet masakra elektorale Rama-Doshi.
Kjo që shihni këtu është vetëm maja e ajsbergut.
Të gjithë shqiptarët janë të vetëdijshëm se se si kanë vepruar Rama-Doshi dhe bandit e pushtetit për të vjedhur dhe blerë rezultatet e zgjedhjeve. Të tjera fakte dhe të dhëna do të publikohen në ditët në vijim.
Një gjë është e sigurta. Ne do të luftojmë me gjithë fuqinë dhe besimin që qytetarët na dhanë në këto zgjedhje, në mënyrë që të rrëzojmë regjimin Rama-Doshi.
