Teksa Organizata Botërore e Shëndetit ka shpallur Coronavirusin pandemi, Kina e ka kaluar pjesën më të vështirë dhe tashmë po rimerr veten dita-ditës.
Madje, është shfaqur e gatshme tu vijë në ndihmë vendeve të tjera që po luftojnë me armikun e padukshëm, mes të cilëve edhe Shqipërisë.
Lajmin e ka bërë të ditur ish-zv.ministrja e Drejtësisë Teuta Vodo, e cila me anë të një statusi në Twitter shkruan se Ambasada e Kinës në Tiranë dhe Departamenti Ndërkombëtar i Komitetit Qëndror të Republikës Popullore të Kinës i ka dërguar një letër Partisë Socialiste.
Në këtë letër, sipas saj, Kina shpreh vlerësimi për menaxhimin e situatës së Coronavirusit nga qeveria shqiptare dhe zbatimin e masave nga qytetarët shqiptarë.
Po ashtu, Departamenti Ndërkombëtar i Kinës ka shprehur gatishmërinë për të vënë në dispozicion të qeverisë shqiptare materialet mbi praktikat dhe eksperiencën e palës kineze për parandalimin dhe kontrollin e pandemisë së nisur në Wuhan.
International Department of China 🇨🇳 in a letter addressed to SPA expressed appreciation for the management of the situation of COVID-19 by 🇦🇱 govt and offer materials on the chinese practices & experience for the prevention & control pandemic #COVID-19🔎 pic.twitter.com/F1gMVAgm6V
— Teuta Vodo (@teutavodo) March 17, 2020
Në rang botëror deri tani janë shënuar 7,953 viktima dhe janë regjistruar mbi 197 ,000 të infektuar në 163 shtete, ndërsa në vendin tonë deri tani ka humbur jetën 1 person dhe janë infektuar 55 të tjerë, teksa në Kosovë janë 19 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
