Banorët e fshatit Baks-Rrjoll kanë hyrë këtë të mërkurë në ditën e 34 të protestave kundër ndërtimit të një resorti turistik në zonën e tyre.
Pavarësisht pranisë së forcave të shumta të policisë në terren, rezistenca e komunitetit vijon, ndërsa punimet për ndërtimin e resortit nuk janë ndalur asnjë ditë.
Banorët shprehen se nuk kanë ndërmend të tërhiqen dhe theksojnë se nuk do ta lëshojnë pronën e tyre. Sipas tyre, beteja do të vazhdojë deri në fund.
Ata akuzojnë biznesmenin Bashkim Ulaj se ka nisur ndërtimet me dhunë, duke shkelur të drejtën e komunitetit mbi pronën dhe duke cenuar mjedisin e zonës.
Protestat, që tashmë kanë kaluar një muaj, janë shoqëruar edhe me përplasje fizike dhe arrestime të disa banorëve, duke e rritur më tej tensionin mes komunitetit lokal dhe interesave private që, sipas tyre, mbështeten nga autoritetet.
