Jo vetëm Edi Rama ka pasur një komunikim me Shtëpinë e Bardhë, konkretisht me këshilltarin e presidentit Turmp, John Bolton, por ka qenë edhe kryeministri kosovar, Ramush Haradinaj.
Ka qenë nënkryetari i Aleancës për Ardhmërinë e Kosovës, Ardian Gjini, i cili ka thënë se çështja kryesore për të cilën është folur mes Haradinajt dhe Bolton është çështja e Kosovës.
Gjini ka thënë se nuk ka qenë i pranishëm gjatë telefonatës, mirëpo sipas burimeve të tij, kryeministrit kosovar i është përmendur ndër të tjera edhe pezullimi i taksës që i është vendosur mallrave serbe.
“Me sa di unë është përmendur që kishte qenë mirë të pezullohet taksa dhe cila ka qenë pjesa tjetër e bisedës nuk e di. Sa e di, biseda ka qenë shumë korrekte, SHBA-të na kanë trajtuar jashtë proporcionalisht mirë në krahasim me madhësinë e shtetit tonë”, ka thënë Gjini në “Rubikon” të KTV-së.
“Kjo temë do të diskutohet por mendoj që gjithë bota duhet ta kuptojë që Kosova duhet me marrë çfarë meriton. Edhe një herë po ju them që është bërë një kohë e gjatë që këtu ka pasiguri, gjithçka ndodh brenda vitit dhe nuk po mundemi të stabilizohemi sepse po dalin gjëra të tjera”, shprehet më tej ai.
