Seanca ndaj kryebashkiakut të Tiranës, Erion Veliaj, e planifikuar për ditën e sotme në GJKKO, është shtyrë. Shkak për shtyrjen është bërë kërkesa e avokatëve mbrojtës, të cilët kanë kërkuar më shumë kohë për t’u njohur me aktet e hetimit dy-mujor, të dorëzuara nga SPAK.
Seanca e radhës është caktuar për datën 23 prill.
Veliaj u arrestua më 10 shkurt në ambientet e Bashkisë Tiranë, si i dyshuar për veprat penale të “korrupsionit pasiv të funksionarëve të lartë shtetërorë ose të zgjedhurve vendorë”, kryer në bashkëpunim në nëntë raste, si dhe për “pastrimin e produkteve të veprës penale ose të veprimtarisë kriminale”.
Në këtë çështje është përfshirë edhe bashkëshortja e tij, Ajola Xoxa, ndaj së cilës është vendosur masa e sigurisë “detyrim paraqitje”.
Sipas të dhënave të siguruara deri tani nga hetimi paraprak, SPAK pretendon se Veliaj dhe bashkëshortja e tij kanë ngritur dhe përdorur një skemë për të përfituar në mënyrë të parregullt fonde publike të Bashkisë së Tiranës. Qëllimi, sipas prokurorisë, ka qenë përfitimi personal dhe pasurimi familjar, përmes veprimeve të kamufluara dhe në kundërshtim me ligjin.
