Prej javësh banorët e Bërxullës vijojnë protestat e tyre, duke kërkuar të marrin kompensimin e pronave që preken nga projekti i rrugës Thumanë-Kashar-Fier.
Ata shprehen se kompania “Gener 2” që ka fituar projektin me koncesion për 35 vite, në kundërshtim me ligjin, ka nisur punën në terren pa pasur një leje ndërtimi. Banorët nuk kanë marrë asnjë njoftim lidhur me projektin, e as për shpronësimet.
Ndërkohë që sot, banorët e Bërxullës kanë zgjedhur të protestojnë para Parlamentit.
Ata shprehen se nuk do të lejojnë zhvillimin e këtij projekti pa marrë kompensim për pronën sipas çmimit të tregut.
“U spostuam nga kryeministria deri te parlamenti që të bëjmë me dije të drejtën tonë që po shkelet nga vetë pushtetarët. S’ka përgjigjie nga institucionet se çfarë do bëhet me pasurinë tonë që e kemi me çertefikatë e të gjitha. Ku do vemi ne?” thotë një nga banorët.
Një tjetër u shpreh se do luftojnë në mënyrë ligjore deri në momentin e fundit, duke theksuar se më pas nuk dihet si do përshkallëzojë situata.
“Duke parë ecurinë e gjithë këtyre ditëve që protestojmë, na janë shuar shpresat, kërkesat tona janë në vesh të shurdhër. Rruga është 22 metër e gjerë plus 40 metra mur mbajtës, pse bëhet ky mur? Pse të kushtojë gjithë këto metra katrorë, këta duan të fusin lekë në xhepat e tyre. Me pronën time pasurohen, më hiqet prona përgjithnjë dhe ai e shfrytëzon, e patolerueshme”-përfundoi një tjetër banor.
“Dua djersën time, pronën time!”-ishte thirrja e përsëritur e protestuesve.
