Hetimet për grupin “Bajri” kanë zbuluar emrat e personave, që janë kanosur me jetë.
Sipas “Dosja.al”, bëhet fjalë për Ardi Vajushin, i cili është pronar i një restoranti në Shirokë, Arjet Miloti, pronar i një agjencie udhëtimesh në Shkodër dhe Ardjan Kiri.
Këta persona janë shantazhuar dhe kërcënuar me jetë, me qëllim dhënien e shumave financiare për grupin “Bajri”, ose siç njihen ndryshe, “Djemtë e Dobraçit”.
Tre biznesmenët mohuan t’u kenë dhënë para anëtarëve të grupit, por përgjimet nxorrën të kundërtën.
Grupi drejtohej nga Safet e Behar Bajri, të cilët kishin krijuar një klimë frike dhe terrori në qytetin verior.
Vetëm përmendja e njërit prej anëtarëve të grupit, mjaftonte për t’i vendosur nën presion biznesmenët.
Përveç kanosjes për dhënie pasurie, anëtarët e grupit merreshin edhe me prodhim e shitje të lëndëve narkotike.
Për shkak të emrit që kishin krijuar në Shkodër, “Bajrajt” kishin ndikim të madh edhe në institucionet shtetërore.
Rezulton se ata kanë ndërhyrë në mënyrë të paligjshme, që një shtetase të merrte provimet, ndërsa punësuan edhe si infermiere në Shkodër, 32-vjeçaren Jorida Murati.
Kjo e fundit është paraqitur në punë vetëm ditën e parë dhe më pas ka marrë rrogën rrogën rregullisht.
Kjo skemë është realizuar me ndihmën e shefit të shërbimit në spitalin e Shkodrës, Senad Halluni, kryeinfermieres Florine Hoxha dhe financieres, Mira Nikaj.
Halluni ka marrë të gjithë përgjegjësinë dhe ka insistuar që pagesat të ishin të plota.
Kjo situatë ka vijuar deri në muajin nëntor, ku kryeinfermierja ka refuzuar nënshkrimin e listëprezencave.
