Edhe miku socialist i Ramës nën peshën e skandaleve/ Në Spanjë protestat që nisën për qiranë e një 87-vjeçareje çojnë Sánchez në zgjedhje të parakohshme

Pedro Sánchez, kryeministri socialist i Spanjës dhe një prej miqve politikë të Edi Ramës në Europë, ka shpallur zgjedhje të parakohshme për 29 nëntor. Një zhvillim që merr një tjetër kuptim kur shihet nga Shqipëria: edhe qeveria e Sánchez është goditur nga skandale dhe hetime që kanë prekur njerëzit më pranë tij, ndonëse në përmasa dukshëm më të vogla se problematikat e denoncuara në Shqipëri. Por në Spanjë, vala e fundit e protestave që nisi nga një çështje qiraje dhe strehimi përfundoi duke e çuar vendin drejt zgjedhjeve të parakohshme.

Gjithçka mori hov pas rastit të Mari Carmen Abascal, një 87-vjeçareje që u dëbua nga banesa në Madrid më 23 shtator. Rasti shkaktoi zemërim të madh dhe u kthye në simbol të krizës së strehimit, duke nxitur një mobilizim masiv qytetar.

Protestat ushtruan presion mbi qeverinë e Sánchez, e cila ndërhyri me dy dekrete për strehimin, mes tyre masa për mbrojtjen e personave vulnerabël nga dëbimet dhe zgjatjen e kontratave të qirasë.

Por të premten, Kongresi i Deputetëve i rrëzoi të dy dekretet. Humbja parlamentare tregoi se qeveria nuk kishte më votat e nevojshme për të kaluar masat e saj dhe vetëm pak ditë më vonë Sánchez shpalli zgjedhjet e parakohshme.

“Ka ardhur momenti që ju, spanjollët, të vendosni se çfarë të ardhmeje dëshironi”, deklaroi kryeministri spanjoll.

Situata bëhet edhe më interesante për Shqipërinë për shkak të lidhjes politike mes dy kryeministrave. Sánchez dhe Rama janë pjesë e së njëjtës familje politike europiane dhe marrëdhënien mes tyre e kanë shfaqur publikisht. Vetë Sánchez e ka cilësuar Ramën “një mik i madh dhe një shok i Partisë Socialiste”, ndërsa kryeministri shqiptar e ka quajtur vazhdimisht mik homologun spanjoll.

Edhe Sánchez është përballur me një seri skandalesh dhe hetimesh që kanë prekur rrethin e tij politik dhe familjar. Bashkëshortja e tij, Begoña Gómez, është përballur me procedime gjyqësore, ndërsa hetimet kanë prekur edhe ish-zyrtarë të lartë të PSOE-së. Vetë Sánchez nuk është i akuzuar në këto çështje dhe ai e partia e tij kanë kundërshtuar akuzat.

Sigurisht, përmasat dhe rrethanat e skandaleve në Spanjë dhe Shqipëri nuk mund të barazohen. Por tabloja politike krijon një paralele të fortë: dy qeveri socialiste, dy kryeministra miq, presion publik dhe akuza apo hetime që prekin njerëz pranë pushtetit.

Dallimi që bie në sy është reagimi politik.

Në Spanjë, një revoltë që mori hov nga dëbimi i një të moshuare nga shtëpia dhe çështja e qirave u shndërrua në një krizë kombëtare. Qeveria reagoi, Parlamenti rrëzoi masat e saj dhe Sánchez, përballë humbjes së mbështetjes parlamentare, vendosi të shpallë zgjedhje të parakohshme.

Miku socialist i Edi Ramës nuk dha dorëheqjen, por vendosi që për krizën politike të flasin sërish qytetarët në kutitë e votimit.