Plas brenda PS-së për hartën që shkrin 15 bashki/ Braçe dhe Sinaj votojnë kundër, Balla u kërkon të binden: Vendimi politik është vota PRO

Reforma territoriale që parashikon shkrirjen e 15 bashkive nuk po përballet më vetëm me kundërshtimin e opozitës dhe protestat e qytetarëve. Përplasja ka hyrë tashmë brenda vetë Partisë Socialiste.

Deputetët socialistë Erion Braçe dhe Vullnet Sinaj kanë votuar kundër draftit të PS-së gjatë mbledhjes së grupit parlamentar, duke shfaqur rezerva për hartën e re që redukton numrin e bashkive nga 61 në 46.

Qëndrimi i dy deputetëve merr peshë të veçantë për shkak të matematikës së votave në Kuvend, pasi për miratimin e reformës nevojiten 84 vota.

PS ka aktualisht 82 deputetë. Nëse Braçe dhe Sinaj do ta ruanin qëndrimin kundër edhe në seancën plenare, socialistët do të zbrisnin në 80 vota. Edhe nëse atyre do t’u bashkoheshin tre votat e PSD-së, reforma do të mbetej me 83 vota, një më pak se minimumi i nevojshëm.

Pra, dy vota që deri dje mund të dukeshin thjesht si pakënaqësi brenda grupit socialist, sot mund të kthehen në problem konkret për miratimin e hartës së re territoriale.

Sinaj ka kundërshtuar veçanërisht shkrirjen e Bashkisë së Selenicës, ndërsa Braçe ka ngritur rezerva për efikasitetin e reformës.

Gjatë diskutimeve në grup, Braçe mësohet të jetë shprehur se propozimi e çon drejt votës kundër.

Reagimi i drejtuesve të PS-së nuk vonoi.

Kreu i grupit parlamentar socialist, Taulant Balla, e bëri të qartë se pavarësisht mendimeve individuale të deputetëve, vendimi politik i grupit është që reforma të votohet.

“Vendimi politik i grupit parlamentar të Partisë Socialiste është që të gjithë deputetët duhet të votojnë pro”, deklaroi Balla.

I pyetur nëse mund të ketë penalitete për deputetët që dalin kundër këtij vendimi në Kuvend, ai nuk e përjashtoi mundësinë, duke iu përgjigjur gazetarëve: “Lexoni rregulloren e grupit”.

Kështu, vetëm pak ditë përpara votimit përfundimtar, reforma territoriale ka prodhuar një situatë të pazakontë brenda mazhorancës: dy deputetë kanë votuar kundër në grup, ndërsa drejtuesi i tij u kujton publikisht se në seancë ekziston një vendim politik për të votuar pro.

Drafti socialist parashikon zhdukjen si bashki më vete të Fushë-Arrëzit, Klosit, Rrogozhinës, Dimalit, Poliçanit, Patosit, Divjakës, Selenicës, Maliqit, Këlcyrës, Memaliajt, Libohovës, Cërrikut, Belshit dhe Përrenjasit.

Por rezistenca nuk vjen vetëm nga brenda Parlamentit.

Ndërsa socialistët diskutonin për votat, banorë dhe përfaqësues të disa prej bashkive që preken nga reforma protestuan përpara Kryesisë së Kuvendit.

“Poliçani nuk negociohet”, “Mos e prekni Selenicën” dhe “Nuk e shuani dot identitetin tonë” ishin disa prej mesazheve të protestuesve që kundërshtojnë humbjen e statusit të bashkive të tyre.

Pra, në të njëjtën ditë, drafti i PS-së u përball me kundërshtim në dy fronte: qytetarët jashtë Kuvendit dhe deputetët socialistë brenda grupit parlamentar.

Nga ana tjetër, opozita kundërshton të gjithë filozofinë e projektit. PD propozon rreth 100 bashki dhe akuzon mazhorancën se po avancon në mënyrë të njëanshme me hartën e saj.

Balla këmbëngul se reforma duhet të ecë përpara. Sipas tij, Shqipërisë i duhen bashki më të forta për të garantuar shërbime dhe për t’u përgatitur për procesin e anëtarësimit në Bashkimin Europian.

Por përpara argumenteve politike qëndron tashmë matematika e votave.

Drafti pritet të shkojë në seancën plenare të 8 tetorit dhe PS-së i duhen 84 vota.

Deri atëherë, pyetja nuk është më vetëm nëse opozita apo qytetarët do ta kundërshtojnë reformën.

Pyetja është nëse Braçe dhe Sinaj do të mbajnë në Kuvend të njëjtën votë që dhanë brenda grupit socialist, apo do t’i nënshtrohen vendimit politik të PS-së për të ngritur kartonin jeshil.