Skandali që rrethon figurën e ndjerë Jeffrey Epstein vijon të trazojë opinionin publik amerikan, ndërsa një artikull i fundit i gazetës prestigjioze Wall Street Journal ka ndezur debate të reja në radhët e republikanëve dhe mbështetësve të Donald Trump.
Gazeta ka zbuluar urime që figura të njohura i kanë dërguar Epstein me rastin e 50-vjetorit të lindjes, mes tyre edhe një letër e dyshuar nga ish-presidenti Trump.
Sipas artikullit të WSJ, letra e Trump ishte formatuar si një dialog imagjinar mes tij dhe Epstein, e shtypur në një fletë ku ishte vizatuar një grua nudo. Në fund të figurës, sipas gazetës, shfaqej edhe firma e Trump, e vendosur në një pozicion provokues, pikërisht në lartësinë e qimeve pubike të vizatimit.
Dialogu i pretenduar përmbante referenca të fshehta seksuale dhe aludime për një marrëdhënie të afërt mes dy burrave.
“Duhet të ketë më shumë në jetë sesa të kesh gjithçka,” thuhet se shkruan Trump në letër, ndërsa përgjigjja imagjinare e Epstein ishte: “Edhe unë e di çfarë është, por nuk do ta them.”
Në përmbajtjen e mëtejshme të letrës, Trump i thotë Epstein: “Një shok është një gjë e mrekullueshme. Gëzuar ditëlindjen dhe uroj që çdo ditë të jetë një tjetër sekret i mrekullueshëm.”
Pasi letra u publikua, ish-presidenti Trump reagoi menjëherë duke mohuar çdo përfshirje. Ai e cilësoi shkrimin si një trillim të pastër dhe paralajmëroi padi ndaj WSJ, kompanisë Newscorp dhe vetë Rupert Murdoch.
“Ata publikuan një histori të rreme, dashakeqe dhe shpifëse,” deklaroi Trump në platformën e tij Truth Social, duke shtuar: “Nëse kjo do të kishte qoftë edhe një fije të vërtete, kundërshtarët e mi politikë do ta kishin bërë publike vite më parë.”
Në këtë klimë polemikash, një pjesë e bazës konservatore të lëvizjes MAGA ka filluar të kërkojë më shumë transparencë dhe publikim të dokumenteve që lidhen me aktivitetet e Epstein dhe rrjetin e tij të fuqishëm.
Nga ana tjetër, autoritetet amerikane kanë mbyllur hetimet mbi vdekjen e Epstein, duke konfirmuar se ai kreu vetëvrasje në burg në vitin 2019, pak para se të dilte në gjyq për krime seksuale dhe trafikim të të miturave.
Departamenti i Drejtësisë dhe FBI-ja theksuan javën e kaluar se nuk ekziston një “listë klientësh” dhe se nuk kanë gjetur prova që Epstein shantazhonte persona të rëndësishëm.
Përkundër konfirmimeve zyrtare, teoritë e konspiracionit vazhdojnë të qarkullojnë me forcë, me shumë zëra që besojnë se Epstein mund të jetë vrarë për të ruajtur sekretet e elitave politike, financiare dhe mbretërore në mbarë botën.
