Në protestën e 12-të e organizuar nga Aleanca për Mbrojtjen e Teatrit (AMT) dhe opozita përpara Bashkisë Tiranë, ku kërkohet dorëheqja e kryetarit të Bashkisë, Erion Veliaj, ka mbajtur fjalën e tij edhe Belind Këlliçi. Ai ka bërë thirrje për qëndresë dhe duke akuzuar zyrtarët për korrupsion.
“Guxoni prekni qytetarët, jeta është shumë e gjatë. Do e keni personale me qytetarët dhe Partinë Demokratike, qoftë ti Met Rrumbullaku, qoftë ti Tonin Vocaj, qoftë ai hajduti i bashkisë,” deklaroi Këlliçi. Ai nënvizoi se beteja do të vazhdojë deri në fund dhe se opozita nuk do të tërhiqet.
Këlliçi i inkurajoi demokratët të mos mërziten, duke theksuar se qëndresa e tyre ia ka dalë të shembë planin e Edi Ramës për të lënë vendin pa opozitë. “Për një të vërtetë shumë të madhe ju ftojmë të qëndroni. Në Bashkinë e Tiranës është një hajdut, një fundërinë si Erion Veliaj, i cili do të marrë faturën që i takon,” tha ai.
Deputeti shtoi se kushdo që ka prekur taksat e qytetarëve të Tiranës dhe që ka grabitur qytetarët, do të përballet me drejtësinë. “Do të shkojë atje ku e meriton,” përfundoi Këlliçi, duke lënë të kuptohet se përgjegjësit do të mbajnë llogari për veprimet e tyre.
Protesta e sotme është një vazhdimësi e lëvizjeve të mëparshme të AMT dhe opozitës, të cilat kërkojnë ndryshime të mëdha në udhëheqjen e Bashkisë Tiranë dhe luftën kundër korrupsionit në vend. Pjesëmarrësit janë të vendosur të vazhdojnë protestat derisa të arrihen qëllimet e tyre.
