Më shumë se 100 organizata humanitare ndërkombëtare, përfshirë Save the Children dhe Médecins Sans Frontières, kanë paralajmëruar për një krizë ekstreme urie në Rripin e Gazës, duke e quajtur situatën “të padurueshme dhe në përkeqësim të vazhdueshëm”.
Në një deklaratë të përbashkët, këto organizata bëjnë thirrje për armëpushim urgjent, hapjen e kalimeve kufitare, si dhe lejimin e një fluksi të plotë ndihmash ushqimore përmes një mekanizmi të mbikëqyrur nga OKB-ja.
Ato theksojnë se aktualisht shpërndarja e ndihmave është shumë e ulët, me vetëm 28 kamionë në ditë, ndërkohë që duhen të paktën 600 për të përmbushur nevojat e 2 milionë banorëve.
Sipas Gjysmëhënës së Kuqe Palestineze, situata në Gaza është përshkallëzuar në një “katastrofë humanitare të paparë”, me mungesë të plotë ushqimi, uji të pastër dhe ilaçesh prej më shumë se katër muajsh.
Ndërkohë, Izraeli pohon se furnizimet janë në Gaza, por akuzon agjencitë e ndihmës për dështim në shpërndarjen e tyre. Zëdhënësi i ushtrisë izraelite publikoi pamje me 950 kamionë ndihmash, të gatshëm për t’u marrë nga organizatat ndërkombëtare.
Ndërkohë, raportet nga terreni flasin për njerëz që vdesin nga uria, përhapje masive të kequshqyerjes, dhe mbi 100 viktima nga uria, përfshirë 80 fëmijë, teksa situata vijon të rëndohet çdo ditë.
