Gazetari Klodian Tomorri me anë të një postimi në rrjetet sociale ka komentuar paralajmërimin për rritjen e çmimit të bukës dhe e ka cilësuar si një marrëzi. Tomorri shkruan se nëse kjo do të ishte thënë në ndonjë vend, sipas tij edhe gjysmë normal, të gjitha shoqatat do të përfundonin në burg.
Ndër të tjera në shkrimin e tij Tomorri ka ngritur edhe disa pikëpyetje ”Çfarë është kjo shoqate qe e di se do rritet çmimi me 10 leke ne treg? Ku e di këtë? Po sikur njeri prej prodhuesve te mos e rrisë çmimin, çfarë ndodh? Po sikur njeri ta rrisë çmimin me 20 leke?”. Në përfundim Tomorri ka thënë se dikush duhet të zgjojë Autoritetin e Konkurrencës, pasi sipas tij “kartelet kanë dalë sheshit”.
Sjellim në vëmendje se prej disa ditësh në media po qarkullojnë kronika ku qytetarët ankohen për rritjen e çmimit të bukës dhe bizneset nga ana tjetër e justifikojnë si të arsyeshme këtë.
Autoriteti i Konkurrencës nuk ka reaguar për rastin në fjalë edhe pse po bënë disa ditë që qarkullon në mediat e shkruara dhe ato televizive. Në këtë mënyrë po lejohet të bëhet hapur oligopol dhe të shfaqen publikisht si kartel më vete, të cilët vendosin vetë për rritjen apo uljen e çmimeve, pa marrë parasysh rregullat që janë vendosur dhe duhet të zbatohen. Gjithashtu po dalin hapur në televizione me zë dhe me figurë dhe deri më tani nuk kemi asnjë reagim nga Autoriteti i Konkurrencës.
Postimi i plotë i Klodian Tomorrit
Shikoni kete fjaline se eshte kryevepra e marrezise:
“Anëtarë të Shoqatës të Prodhuesve të Bukës, Patiçerive dhe Brumrave thonë se së shpejti rritja e çmimit të bukës me 10 lekë do të ndodhë në të gjithë tregun.”
Nese kjo fjali do ishte thene ne ndonje vend, qofte edhe gjysme normal, gjithe shoqata e brumit, byrekeve dhe bakllavase sot do ishte transferuar tek 313-a.
Keta jane shume te lezetshem. Mire qe bejne rritje te kordinuar te cmimit, por dalin dhe e thone ne media. Dmth keta dalin shpallin kartelin publikisht. Eshte njesoj sikur te dalesh ne televizon dhe te thuash sapo vrava njerin aty matane.
Cfare eshte kjo shoqate qe e di se do rritet cmimi me 10 leke ne treg? Ku e di kete? Po sikur njeri prej prodhuesve te mos e rrise cmimin, cfare ndodh? Po sikur njeri ta rrise cmimin me 20 leke?
Tani, dikush te zgjoje keta dedete e Autoritetit te Konkurrences se i kane plasur kartelet sheshit. Po ja thone ne surrat qe jemi kartel.
