Eksperti i arsimit, Ndriçim Mehmeti, ka ngritur shqetësime të forta mbi dështimin e Paktit për Universitetin, duke akuzuar për shkelje ligjore të pandëshkuara dhe projekte të pambajtura.
Sipas Mehmetit, një ndër premtimet kryesore ishte mbledhja e Grupit Ndërinstitucional të Punës, i cili me urdhër të Kryeministrit do të duhej të kishte përfunduar që në mars të vitit 2019 projektin e fizibilitetit dhe ndërtimit të kampusit universitar në Tiranë. Por ky zotim, sipas tij, mbeti vetëm në letër.
Ai theksoi gjithashtu se fondi prej 800 mijë eurosh i alokuar për bibliotekën online rezultoi i kotë, pasi sot ajo nuk është funksionale.
Ndër të tjera, Mehmeti ironizoi edhe me dështimin e kartës së studentit, duke e quajtur “pa vlerë”, pasi sipas tij, ajo shërben për përfitime periferike si blerja e mishit apo riparimi i makinave, sikur studentët të gjithë të zotëronin “Ferrari”.
“Pakti i Univeristetit ka shkelje ligjore për të cilat nuk përgjigjet askush. Kryeministri deklaroi se me urdhër të tij do të mblidhej GNP-ja që është Grupi Ndërinstitucional i Punës, i cili në mars 2019 duhet të përfundonte hartimin e të gjithë projektit të fizibilitetit dhe projektit të ndërtimit të kampusit të Tiranës, nuk u bë. Do të bëjmë një kampus në Durrës, nuk u bë. I vetmi univeristet në Europë që s’ka fjetina. Pakti për Universitetin u shkërmoq. Po të shohim shpenzimet e një studenti këtu janë shumë më të larta se në shtete të tjera. Një i ri edhe po të shkojë në fjetinat e qytetit Studenti duhet të paguajë vetëm për krevat, 70 mijë lekë të rinj në vit.
Qeveria nuk arriti dot bibliotekën online, u dhanë 800 mijë euro, sot nuk e kemi aktive. Nuk arriti dot që të bëjë kartën e studentit të vlefshme, se u bë për të shkuar te Kulla e Sahatit, për të blerë mish e gogozhare e për të vajtur në servise a thua se studentët kanë të gjithë nga një ‘Ferrari’ e s’kanë ku ta riparojnë”, tha eksperti i Arsimit, Ndriçim Mehmeti.
