Presidenti Ilir Meta ka kërkuar nga qeveria dhe nga Komiteti Teknik i Ekspertëve që të heqin karantinën dy-javore për emigrantët që vijnë në vend nga Maqedonia e Veriut dhe nga Greqia. Sipas Metës ky vendim është ndalim i votës për emigrantët dhe kjo përbën akt të rëndë antikushtetues. Presidenti e quajti këtë vendim të turpshëm pasi emigrantët jo vetëm që nuk lejohen të votojnë atje ku janë, por nuk lejohen as të vijnë këtu. Meta ka thënë se qeveria është duke i fshehur vdekjet nga virusi dhe i kërkon Komitetit dhe KQZ-së që ta heqin këtë ndalesë.
“Ndalimi i votimit të emigrantëve nga Greqia përbën një akt të rëndë, antikushtetues. Arsyetimi i ndalesës së mijëra bashkëatdhetarëve tanë është pretekst fals, i pabazuar shkencërisht, absurd, përdorim politik, nga situata e pandemisë nga ana e partisë shtet. Kjo është farsa e turpshme për përfshirjen e diasporës në votime. Jo vetëm nuk po përfshihen të votojnë aty ku janë, por nuk lejohen as të vijnë këtu. Këta po fshehin nga statistikat rreth 10 mijë vdekje të shkaktuara nga virusi. I bëj apel urgjent qeverisë, Komitetit të manipuluar të Ekspertëve dhe KQZ të heqë menjëherë këtë ndalesë, që përbën një veprim flagrant antikushtetues”, tha Meta.
