Një operacion i befasishëm i Policisë së Burgjeve më 29 maj në paraburgimin e Durrësit çoi në sekuestrimin e 12 celularëve të gjetur në zonën e gjelbër të institucionit.
Pajisjet janë dërguar për ekspertim në laborator, për të përcaktuar kujt i përkisnin dhe nëse janë përdorur nga të paraburgosurit.
Burime pranë hetimit bëjnë me dije se telefonat nuk u gjetën në qeli, por në ambientet e jashtme, duke ngritur dyshime se mund të ishin përdorur nga të burgosurit dhe më pas fshehur, ose ishin vendosur aty me synimin për t’u futur më pas në brendësi të qelive.
Në këtë institucion vuajnë masat e sigurisë edhe emra të njohur të politikës dhe administratës publike, si ish-ministri i Shëndetësisë Ilir Beqaj, ish-ministri i Mjedisit Lefter Koka, ish-deputetët Alqi Bllako e Jurgis Çyrbja, si dhe kryebashkiaku i Tiranës, Erion Veliaj.
Ndërkohë, Drejtoria e Përgjithshme e Burgjeve ka hapur një hetim administrativ për të zbuluar se si u futën celularët në ambiente të siguruara.
Kamerat e sigurisë brenda dhe përreth institucionit pritet të ndihmojnë në zbardhjen e këtij rrjeti të mundshëm të kontrabandës brenda sistemit penitenciar.
