Në aeroportin ndërkombëtar të Kabulit, prej dy ditësh mbizotëron kaosi dhe paniku, pasi qytetarët afganë përpiqen të largohen nga vendi, pas marrjes së pushtetit nga talebanët. Pista e aeroportit, shkallët dhe avionët, janë plot me njerëz në panik, që duan të dalin nga Afganistani sa më parë.
Ushtarët amerikanë që ishin caktuar të ruanin aeroportin, qëlluan në ajër për të zmbrapsur mijëra afganë që kishin hyrë në pistë. Sipas Departamentit të Shtetit, rreth 6 mijë trupa amerikane po ruajnë aeroportin, përmes të cilit po evakuohen nga Afganistani qindra njerëz, kryesisht ata që kanë punuar në ambasada e institucione të tjera diplomatike.
Përveç Amerikës që është tërhequr, edhe Anglia duket se nuk e ka në plan t’i shpallë luftë talebanëve. Këtë gjë, e pranoi edhe ministri i mbrojtjes i Mbretërisë së Bashkuar.
“Unë e pranoj që talebanët kanë kontrollin e vendit”, tha Sekretari i Mbrojtjes Ben Wallace për Sky News. “Dua të them, nuk duhet të jesh politolog për të kuptuar se ku jemi këtu”, shtoi ai. I pyetur nëse Britania dhe NATO do të ktheheshin në Afganistan, Wallace thotë: “Kjo nuk është në marrëveshje… ne nuk do të kthehemi”.
Shtetet e Bashkuara të Amerikës i kanë kërkuar Kosovës, por edhe Shqipërisë që të strehojnë përkohësisht shtetas afganë pas situatës së krijuar atje dhe marrjes së pushtetit nga talebanët. Të dyja shtetet kanë pranuar që të strehojnë shtetasit afganë!
