Sekretari i Përgjithshëm i OKB-së Antonio Guterres ka kritikuar premtimet e pambajtura të talebanëve për gratë dhe vajzat afgane dhe i ka bërë thirrje botës të injektojë para në Afganistan në mënyrë që të parandalojë kolapsin ekonomik të tij.
“Jam veçanërisht i alarmuar kur shoh se premtimet e dhëna grave dhe vajzave afgane nga talebanët janë thyer”, u tha ai gazetarëve të hënën në Nju Jork.
“Unë i bëj apel fuqishëm talebanëve që të mbajnë premtimet e tyre për gratë dhe vajzat dhe të përmbushin detyrimet e tyre sipas të drejtave ndërkombëtare të njeriut dhe ligjit humanitar”, vazhdoi ai.
Miliona vajza adoleshente në të gjithë Afganistanin ende presin të kthehen në shkollë, ndërsa talebanët i lejuan djemtë të ndiqnin mësimet muajin e kaluar. Ky veprim ka ngritur shqetësime për të ardhmen e arsimit të grave nën talebanët, të cilët janë zotuar të mbrojnë të drejtat e vajzave dhe grave në vend kur ata morën pushtetin në gusht.
Përjashtimi i vajzave në këtë kohë ka shtuar frikën se talebanët mund të kthehen në sundimin e tyre të ashpër të viteve 1990. Gjatë asaj kohe, grave dhe vajzave iu ndalua ligjërisht arsimi dhe punësimi. Grupi ka emëruar gjithashtu një kabinet krejt meshkuj dhe tha se gratë mund të përfshihen më vonë.
Guterres tha se është “i alarmuar” teksa sheh premtimet “të thyera”, duke shtuar se barazia gjinore është një përparësi për të.
“Premtimet e thyera çojnë në ëndrra të thyera për gratë dhe vajzat e Afganistanit,” tha shefi i OKB -së. Gratë dhe vajzat duhet të jenë në qendër të vëmendjes”, shtoi ai.
