Mbi 100 të dënuar në Burgun e Reçit raportohet se janë futur në grevë urie dhe prej dy ditësh kanë refuzuar ushqimin në shenjë proteste.
Mësohet se të dënuarit kërkojnë që të takojnë familjarët pasi që prej pezullimit të lejeve për shkak të pandemisë së Covid-19, e vetmja mënyrë kontakti për ta ka qenë telefoni. Ata kërkojnë leje që të shkojnë në shtëpi.
Kujtojmë se vetëm dy ditë më parë, të burgosurit i kanë dërguar letër edhe presidentit Ilir Meta, kryeministrit Edi Rama, kryeparlamentarit Gramoz Ruçi dhe ministres së Drejtësisë, Etilda Gjonajt.
Gjithashtu ata i kanë dërguar letër edhe gazetares së kronikës, Anila Hoxhës, ku kanë kërkuar prej saj që të bëjë publike në media kërkesat e tyre ku mbi të gjitha primare është trajtimi human.
Ndërkohë, në grevë urie janë prej disa ditësh edhe 170 të burgosur në burgun e Peqinit. Të burgosurit në burgun e Peqinit kanë kërkuar rishikim të dënimeve të tyre dhe amnisti.
Vetëm disa ditë më parë edhe të burgosurit e burgut të sigurisë së lartë së Shënkollit kanë bërë grevë urie duke kërkuar më shumë të drejta dhe kushte më të mira në burg.
Të burgosurit e burgut të Reçit kanë zhvilluar edhe një takim me një grup nga Drejtoria e Përgjithshme të Burgjeve dhe përfaqësues të Avokatit të Popullit, por nuk dihet ende çfarë vendimi është marrë. Sakaq, ministrja e Drejtësisë, Etilda Gjonaj u shpreh se nuk pret që të dënuarit ta pranojnë lehtë regjimin bis 41, pasi është i vështirë./ GazetaRefoma.com
