Detaje të reja janë zbuluar nga operacioni ndërkombëtar, që çoi në sekuestrimin e 137 kg kokainë në Durrës.
Sipas “TCH” trafikantët kishin vendosur GPS të fjalës së fundit të teknologjisë në thasët me kokainë.
Droga ishte e ndarë në 4 kontenierë me babane, të cilët i përkisnin firmës së një biznesmeni nga Vlora.
Në portin e Pireut në Greqi, përveç GPS të trafikantëve janë shtuar edhe të tjerë nga hetuesit.
Më pas pjesa e madhe e kokainës u zëvendësua me oriz të presuar, ndërsa 17 pako të tjera me gips.
Kur kontenierët arritën në portin e Durrësit u vunë nën mbikëqyrje nga grupi operacional.
Ka qenë pikërisht biznesmeni Gentian Malindi, që hyn me bexh në terminal dhe qëndron në makinën me targa franceze.
I arrestuari tjetër Ardian Bega me detyrë patrullues, shpërqëndron rojen e sigurisë, duke e qerasur me alkool.
Ndërsa personi tjetër i vënë në pranga, Altin Myslihaka, ka vazhduar drejt kontenierëve për të marrë drogën.
Në dëshminë e tij, 53-vjeçari Bega, pohon se sapo kanë hipur në makinë, Malindi i kërkon që të prekë njërën nga pakot nëse shtypet apo jo.
Më tej ai ka udhëruar që të çajë pakon dhe sapo kanë parë orizin, Malindi ka urdhëruar që askush të mos flasë, ndërsa ka hedhur edhe drogën.
Policia ndërkohë nuk ka dhënë shpjegime sesi u zhduk makina me ngarkesën, brenda së cilës ndodhej edhe GPS i vendosur në Pire.
Deri më tani ka shumë të dyshuar si pritës të drogës, por ndaj tyre ka shumë pak prova.
