Mark Samson, 23-vjeçari me origjinë filipinase që vrau Ilaria Sulën, i ka dërguar një letër pendese familjes së saj nga burgu Regina Coeli në Romë, ku ndodhet në paraburgim dhe po mbahet nën vëzhgim të rreptë për shkak të rrezikut të mundshëm për vetëlëndim.
Në letrën e bërë publike nga mediat italiane, Samson shpreh pendesë për krimin e kryer dhe deklaron se është i gatshëm të përballet me pasojat ligjore.
“Unë jam Mark Samson dhe po shkruaj nga qelia ime ku do të qëndroj për disa vite. Çdo ditë mendoj për krimin mizor që kam bërë dhe nuk di çfarë të them, por mbi të gjitha nuk e di se çfarë më ka ndodhur. Është banale të kërkoj falje për dhimbjen që kam shkaktuar, por dua t’i kërkoj falje Ilarisë dhe nuk desha ta lija. Unë jam çmendur nga pikëllimi dhe kam humbur kontrollin. Jam i vetëdijshëm se asgjë që mund të them apo të bëj sot nuk do ta lehtësojë qoftë edhe pak dhimbjen e familjes. Nuk po përpiqem të zvogëloj përgjegjësitë e mia apo të shpëtoj nga pasojat e veprimeve të mia. Jam gati të paguaj mëkatet e mia pa asnjë justifikim. MS.”
Pavarësisht kësaj letre, familja e Ilaria Sulës nuk e ka pranuar kërkesën për falje. Përmes avokatit të tyre, Giuseppe Sforza, ata e kanë konsideruar tekstin si një përpjekje për përqendrim te vetja, pa ndjeshmëri të vërtetë ndaj tragjedisë së shkaktuar.
“Teksti i kësaj letre duket më shumë si një pasqyrim i vetes së tij, pa asnjë vëmendje reale ndaj peshës së veprës së kryer. Secili ka të drejtën të shkruajë, por gjithashtu prindërit e Ilarias, gjithë familja e saj, vëllai dhe të tjerët, kanë të drejtën të mos i pranojnë këto ndjesa. Letra nuk fshin mizorinë e asaj që është kryer,” thuhet në reagim.
Ndërkohë, Prokuroria Publike e Romës ka urdhëruar ekspertizën e pajisjeve teknologjike të viktimës dhe të të dyshuarit, përfshirë telefonin e Mark Samson dhe tabletin e sekuestruar në banesën e Ilaria Sulës. Hetuesit theksojnë se deklaratat e Samson përmbajnë elemente të paqarta dhe hetimi mbi përmbajtjen e pajisjeve mund të ndihmojë në zbardhjen e mëtejshme të motiveve dhe rrethanave të krimit.
