Pas vrasjes së dy diplomatëve izraelitë në Uashington D.C., të gjitha misionet diplomatike të Izraelit në botë do të ulin flamujt në gjysmë shtize, në nderim të viktimave.
Vendimi u bë publik nga Ministri i Jashtëm izraelit, Gideon Sa’ar, gjatë një konference për shtyp në Jerusalem.
“Ministria dhe të gjitha misionet tona do të ulin flamujt për të nderuar kujtimin e Yaron Lischinsky dhe Sarah Milgrim, dy anëtarëve tanë të respektuar të shërbimit diplomatik,” deklaroi Sa’ar.
Ndërkohë, kryeministri Benjamin Netanyahu urdhëroi rritjen e masave të sigurisë në të gjitha ambasadat dhe konsullatat izraelite në mbarë globin, duke e cilësuar sulmin si pasojë e “nxitjes ndaj Izraelit dhe një shfaqjeje të dhimbshme të antisemitizmit”.
Sipas autoriteteve amerikane, incidenti ndodhi të mërkurën në mbrëmje pranë Muzeut Hebraik në kryeqytetin amerikan, ku një person i armatosur hapi zjarr ndaj dy diplomatëve.
Viktimat, një burrë dhe një grua, humbën jetën në vendngjarje. Autori u identifikua si Elias Rodriguez, 30 vjeç. Gjatë arrestimit, ai thuhet se bërtiti “Liri për Palestinën”.
Ngjarja ka ngjallur reagime të forta nga zyrtarë të lartë në Izrael dhe në SHBA, të cilët e kanë dënuar ashpër sulmin, duke e cilësuar atë si një akt ekstrem urrejtjeje dhe dhune ndaj përfaqësuesve diplomatikë.
